திரைப்பார்வை

King Kong கிங் கொங்.

Naomi Watts நாஓமி வோட்ஸ்

கிங் கொங்கை பார்வையாளர்கள் நம்புகிறார்கள் என்றால், கிங் கொங்கிற்காக தங்களையும் மீறி திரையரங்கில் சத்தம் எழுப்புகிறார்கள் என்றால் அதற்குக் காரணம் நாவோமி வோட்ஸ்.

Lord of the Rings Triologyக்குப் பிறகு பீட்டர் ஜாக்சன், 1933இல் வெளிவந்த கிங் கொங் படத்தை இயக்கப்போகிறார் என்று செய்தி வந்தது. லோர்ட் ஓஃப் த ரிங்க்ஸ் படங்களுக்குப் பிறகு ஜாக்சனின் திறமைமீது எல்லோரும் நம்பிக்கை இருந்தது. நேற்றைக்கு நிரம்பி வழிந்த திரையரங்குகள்தான் அதற்கு அடையாளம். இரண்டாம் நாளான இன்றுகூட ஒரு இருக்கையும் காலியாக இருக்கவில்லை என்று நண்பர்கள் சொன்னார்கள்.

பீட்டர் ஜாஸ்சனின் படங்கள் மூன்று மணித்தியாலத்து மேல் ஓடுவது பெரிய விதயமல்ல. முதல் அரைமணி நேரம் முப்பதுகளின் நீயூயோர்க் நகரமும் அங்கே வசிக்கும் மக்களும், படத்தின் முக்கிய கதாபாத்திரங்களும் காட்டப்படுகிறார்கள். நாவோமி வோட்ஸ், ஜாக் ப்ளாக் & ஏட்ரியன் ப்ரோடி ஆகியோரின் பாத்திரங்கள் எத்தகையது என்று அறிமுகப்படுத்தும் அந்த முதல் அரைமணி நேரம் கொஞ்சம் நீளந்தான். ஆனாலும், பாத்திரங்களின் குணாதிசியங்களைக் காட்ட அந்த அரைமணிநேரம் தேவைப்படுவதையும் ஒத்துக்கொள்ள வேண்டும். என்ன, கிங் கொங் திரையில் தோன்றும் தருணத்தைத் தான் எல்லோரும் எதிர்பார்த்துக்கொண்டிருந்தோமே.

எல்லோரின் எதிர்பார்ப்பையும் பீட்டர் ஜாஸ்சன் எதிர்பார்த்ததைவிட நன்றாகவே பூர்த்தி செய்திருக்கிறார். லோர்ட் ஓஃப் த ரிங்க்ஸ் படங்களில் பயன்படுத்திய கணினி உத்திகள் இங்கே இன்னும் அருமையாக படமாக்கப்பட்டிருக்கின்றன. இந்த இடத்தில் ஒன்று சொல்லவேண்டும்., பிஜி-13 என்று சான்றிதழ் படத்திற்கு கொடுத்திருக்கிறார்கள். பத்துப் பதினொரு வயதுக்குக் குறைந்தவர்களைப் படத்திற்கு அழைத்துச் செல்ல வேண்டாம். கிங் கொங் இருக்கும் தீவில் வாழ்பவர்களாகக் காட்டப்படும் மனிதர்கள் குழந்தைகளைப் பயமுறுத்தலாம். அத்தீவில் வாழும் சில உயிரினங்களும் குழந்தைகளைப் பயமுறுத்தலாம்.

நாவோமி வோட்ஸை Mulholland Drive பலரது கவனத்துக் கொண்டு வந்த படமென்றால், கிங் கொங் அவரைச் சிறுவர்கள் பெரியவர்கள் என்று எல்லோரின் கவனத்திலும் பல நாட்கள் இருக்க வைக்கும் படம். நாவோமி வோட்ஸின் நடிப்பை, இங்கே பல காட்சிகளைச் சொல்லி சிலாகிக்கலாம். ஆனால் கதையை வெளியே சொன்ன பாவத்திற்கு ஆளாகவேண்டாம் என்று நினைப்பதால்.. .. அதேபோல கவனத்தை ஈர்த்த இன்னொருவர் ஜாக் ப்ளாக். ப்ரூஸ் வில்லிஸ் ஜாக்கலாக நடித்த ‘The Jackal’ படத்தில்தான் ஜாக் ப்ளாக்கை முதன்முதல் கவனித்தேன். விழுந்து விழுந்து ஆயுதம் தயாரித்து, அந்த ஆயிதத்துக் பலியாகும் முதல் ஆளாக கவனத்தை ஈர்த்து, பரிதாபத்தையும் பெற்றவர். அதற்குப்பிறகு 2003இல் வந்த ‘The School of Rock’ படத்தில் நடித்த்தற்காக விருதுகள் வாங்கினாலும் பார்க்க வேண்டும் என்று தோன்றவில்லை. எனக்குப் பிடித்த ‘Shark Tale’ படத்தில் Lennyஆக ப்ளாக்தான் குரல் கொடுத்தார் என்பதுவும் ஆச்சரியமான செய்தியாகவே இருந்தது. ‘Mommy said not to hit’ வசனம் இங்கே அடிக்கடி நடித்துக் காட்டப்படும். கிங் கொங்கில் ஜாக் ப்ளாக்கின் நடிப்பைப் பார்த்தபிறகு அவரது ‘The School of Rock’ படத்தைப் பார்க்கவேண்டும் என்று தோன்றுகிறது. One of these days..

Adrien Brody, நாடகாசிரியர் ஜாக் டிரிஸ்கோலாக நடித்திருக்கிறார். இந்தப் பாத்திரத்துக்கு ஏனைய நடிகர்களோடு போட்டிபோட வேண்டும் என்று ஏட்ரியன் ப்ரோடி நினைத்தாராம். அப்படியெல்லாம் இல்லை, ஜாக் டிரிஸ்கோல் பாத்திரத்துக்கு ஏட்ரியன் ப்ரோடியைத் தவிர வேறு யாரையும் தேர்ந்தெடுக்கவில்லை என்று சொன்னார்களாம்.

லோர்ட் ஓஃப் த ரிங்க்ஸ் படங்களில் Gollumஆக நடித்த Andy Serkis இந்தப் படத்தில் கிங் கொங்காக நடித்திருக்கிறார்.

முதல் கிங் கொங் படம் வெளிவந்த 1933இல் நடப்பதாகவே பீட்டர் ஜாஸ்சன் படமெடுத்திருக்கிறார். கறுப்பு-வெள்ளையில் எடுக்கலாம் என்று சிலர் யோசனை சொன்னார்களாம். அப்படியில்லாமல் மங்கலாக இருக்கும் வர்ணம் உபயோகப்படுத்தி இருப்பது நன்றாகவே இருக்கிறது!

பீட்டர் ஜாஸ்சனுக்கு படம் எடுக்க முதலே சம்பளம் கொடுத்துவிட்டார்கள். 20 மில்லியன் அமெரிக்க டாலர்கள். இந்தளவு பணம் ஒரு இயக்குநருக்கு, அதுவும் படத்தை இயக்குவதற்கு முதலே இப்போதுதான் கொடுத்திருக்கிறார்கள். இந்தப் படத்தை எடுக்க ஆன செலவு 200 மில்லியன்.

ஒரு முறைக்குப் பல முறை பார்க்கலாம். நீங்களும் பார்த்தபிறகு விலாவாரியாக அலசுவோமே!!! என்ன சொல்றீங்க? அப்படியே இந்த வரு்ஷம் ஓஸ்கர் பரிந்துரையில் நாவோமி வோட்ஸின் பெயரையும் சேர்த்துக்கொள்ளுங்கள்.

http://www.kongisking.net/index.shtml

தமிழ்ப்பதிவுகள், தமிழ், தமிழ்ப்பதிவு, திரைப்படம், திரைப்பார்வை

Seducing Doctor Lewis

கியூபெக், கனேடிய மாகாணங்களிலேயே மிகவும் வித்தியாசமானது. கியூபெக் மாகாணமொழி பிரெஞ்சு என்பது மட்டும் பெரிய காரணமல்ல. நீயூப்ரொன்ஸ்விக் மாகாணத்திலும் ப்ரெஞ்சு மொழிதான் பெரும்பாலும் பேசப்பட்டு வருகிறது. கியூபெக் மாகாணம் வடக்கே ஆர்டிக்கில் இருந்து தெற்கே அமெரிக்காவரை நீள்கிறது. வடக்கே கரையோரக் கிராமங்களில் மீன்பிடித்தல்தான் பிரதானமான தொழில். ஆனால், கடல் வளங்கள் அருகிவரும் இந்நாட்களில் பலவிதமான கடல்வாழ் உயிரினங்களைப் பிடிக்க அரசாங்கம் தடை விதித்திருக்கிறது. கூடவே பல நூற்றாண்டுகளாக வைக்கிங் மக்கள் தொடங்கிப் பலரும் மீன் பிடித்து வருவதால் இப்பகுதியில் கடல்வாழ் உயிரினங்களுக்குத் தட்டுப்பாடாக இருக்கிறது. இந்தக் கரையோரக் கிராமத்தவர்கள் வேறேதும் தொழில் செய்யும் நிலைக்குத் தள்ளப்படுகிறார்கள். முடியாதவர்களுக்கு அரசாங்கம் மாதாமாதம் உதவித் தொகை வழங்குகிறது. உழைத்துப் பழகிய மக்களுக்கு இந்த உதவித்தொகை மிகவும் அவமானகரமானதாக இருக்கிறது. ஆனாலும் ஏதும் செய்யமுடியாதென்பதால் பொருத்துக்கொண்டு வாழ்க்கையைக் கழிக்கிறார்கள்.

இம்மாதிரியான கியூபெக் கரையோரக் கிராமங்களில் ஒன்றுதான் செயிண்ட் மாரீ-லா-மோடேர்ன்ன்(St. Marie-La-Mauderne). லா கிராண்ட்ந் செடக்ஸியோன்(La Grande Seduction) திரைப்படம் செயிண்ட் மாரீ-லா-மோடேர்ன்ன் கிராமத்தில் நடக்கிறது. பன்னாட்டு நிறுவனமொன்று செயிண்ட் மாரீ-லா-மோடேர்ன்னில் ஒரு பிளாஸ்டிக் தொழிற்சாலையை நிறுவுவதற்கான சாத்தியங்களை ஆராய்கிறது. அப்படியொரு தொழிற்சாலையைத் தொடங்க, செயிண்ட் மாரீ-லா-மோடேர்ன்ன் கிராமத்தில் குறைந்தபட்சம் ஒரு மருத்துவராவது இருக்கவேண்டும் என்பது காப்புறுதி நிறுவனத்திட்ட விதிகளில் ஒன்று. எட்டு வருடங்களாக வேண்டா வெறுப்பாக அரசாங்க உதவிப்பணத்தைப் பெற்று வந்த மக்கள், ஒரு மருத்துவரைக் கொண்டு வரும் முயற்சிகளில் ஈடுபடுகிறார்கள். அத்தொழிற்சாலை, கிராமத்தின் நிதிநிலையை மாற்றிவிடும் என்பதை மக்கள் தெளிவாகப் புரிந்துகொள்கிறார்கள்.

மொன்ரியலில் வேலை செய்யும் அக்கிராமத்தைச் சேர்ந்த போலீஸ்காரரொருவரின் உதவியோடு ஒரு மருத்துவரையும் வரவழைத்துவிட்டார்கள். சட்டப்பிரச்சினையில் இருந்து தப்பிப்பதற்காக சில வாரங்கள் செயிண்ட் மாரீ-லா-மோடேர்ன் கிராமத்தில் வேலை செய்ய அந்த மருத்துவரும் ஒத்துக்கொள்கிறார். அவ்வாறு வரும் டொக்டர் லூயிஸை எப்படிக் கிராமத்திலேயே நிரந்தரமாகத் தங்க வைக்கலாம் என்று கிராம மக்கள் அனைவரும் யோசிக்கிறார்கள். பல்வேறு முயற்சிகளைச் செய்கிறார்கள். கிராமத்திலேயே வசதியுள்ள வீட்டைக் காலி செய்து தங்க வைக்கிறார்கள், தொலைபேசியில் என்ன பேசுகிறார் என்பதை ஒட்டுக் கேட்கிறார்கள், தினமும் வழியில் காசு கிடைத்தால் அதிர்ஷ்டம் என்று நினைத்து மொன்ரியல் திரும்ப மாட்டார் என்று முடிவு செய்து ஒருவர் வழியில் ஐந்து டாலர் நோட்டைத் தினமும் போட்டு வைக்கிறார். ஒட்டுக்கேட்டதில் டொக்டருக்கு Beef Stroganoff பிடிக்குமென்று அதையும் உணவுவிடுதியில் சமைக்க ஏற்பாடு செய்கிறார்கள், ஜாஸ் இசை பிடிக்கும் என்பதால் இசையில் ஓரளவு ஆர்வமுள்ள ஆளைப் பேச்சுத்துணைக்கு ஏற்பாடு செய்கிறார்கள், மீன் பிடிக்கப்போகும் டொக்டரில் தூண்டிலில் ஐஸில் வைத்த மீனை கடலுக்குள் மூழ்கி கொழுவி விடுகிறார்கள்.

இதெல்லாம் சுவாரசியமான, யோசித்துப் பார்க்கையில் கொஞ்சம் வருத்தம் கொடுக்கக்கூடிய முயற்சிகள்தான்! ஆனால், இந்தப் படம் எனக்குப் பிடித்துப்போனதற்கான முக்கியமான காரணம் வேறு. டொக்டர் லூயிஸுக்கு கிரிக்கெட் விளையாட்டு பிடிக்கும் என்பதை அவர் மொன்ரியலில் இருக்கும்போதே தெரிந்துகொண்ட கிராமத்து மக்கள் இணையமூடாக கிரிக்கெட் பற்றித் தெரிந்துகொள்கிறார்கள். வட-அமெரிக்காவில் வாழும் மக்களுக்கு நான் சொல்லப்போவது ஓரளவு தெரிந்திருக்கும். அமெரிக்காவில் ஃபுட்போல், பேஸ்போல் போன்ற ஆட்டங்கள் பிரபலமென்றால் கனடாவில் மிகவும் பிரபலமான ஆட்டம் ஐஸ்-ஹொக்கி. இப்போது Grey Cup ஆட்டம் நடந்துகொண்டிருக்கிறது. கடந்த வார-இறுதியில் மொன்ரியல் ஆல்ஸ்(Montreal Alouettes) எட்மொண்டன் எஸ்கிமோஸ் அணியினரிடம் தோற்றுப் போய்விட்டார்கள். லிபரல் கட்சியின் ஆட்சி இவ்வாரம் முடிவுக்குக் கொண்டு வரப்பட்டது. அதைவிட, கிரே கப் ஆட்டத்தில் மொன்ரியல் ஆல்ஸ் தோற்றுப்போனதுதான் பொது இடங்களில் பேசப்பட்டது. ஏன் இந்தளவு விலாவாரியாகச் சொல்கிறேன் என்று நீங்கள் நினைக்கலாம். நம்மூரில் கிரிக்கெட் ஆட்டத்துக்கு இருக்கும் வெறிக்குக் கொஞ்சமும் குறைவானதல்ல கனேடியரின் இந்த ஐஸ்-ஹொக்கிப் பிரியம்.

இப்படிப்பட்டவர்கள், கிரிக்கெட் விதிமுறைகளை இணையத்தில் பிரதியெடுத்துக்கொண்டு அனுபவசாலியொருவரும் இல்லாமல் விளையாட முயற்சித்தால் எப்படியிருக்கும் என்று யோசித்துப்பாருங்கள்! Hilarious! அதுவும் கிரிக்கெட் ஆட்டத்தைப்பற்றித் தெரிந்த நமக்கோ வழக்கத்தைவிட அதிகமாக இரசிக்க முடிந்தது. இன்னோடு படம் பார்த்த முன்னாள் கிரிக்கெட் இரசிகர் ஒருவரும், ‘இந்த பகிடியெல்லாம் இங்கத்தையாக்களுக்கு விளங்காதே?’ என்றார். ஒரு அணியில் பதினொரு பேர் வேண்டும் என்பதில் தொடங்கி, ஆட்டக் களம் தயார் செய்வது, பந்து போடுவது, விக்கெட்-கீப்பர் வேலை செய்வது, பந்தை அடித்து ஆடுவது என்று எல்லாமே குழப்பம். டொக்டருக்கோ ஏதோவொரு மூலையில் இருக்கும் இத்தீவில் கிரிக்கெட் ஆட்டமா என்ற வியப்பு. டொக்டருக்காக கிராமத்தின் ஒரேயொரு உணவு விடுதியில் கேபிள் வழியாக கிரிக்கெட் ஆட்டம் பார்க்க ஏற்பாடு செய்கிறார்கள். இயற்கை அழைப்புக்கு டொக்டர் வெளியே போகும் நேரத்தில் ஐஸ்-ஹொக்கி ஆட்டத்துக்கு மாற்றி ஒவ்வொரு அசைவுக்கும் கூச்சலிட்டு ஆரவாரம் செய்யும் கிராம மக்கள். விக்கெட் விழுந்துவிட்டதோ, சிக்ஸர் அடித்துவிட்டார்களோ என்று அரக்கப்பரக்க ஓடிவரும் டொக்டர் என்று ஒரே கூத்துத்தான்.

இப்படியெல்லாம் கிராமத்தவர்கள் செய்யும் முயற்சிகள் பயனளிக்கிறதா? டொக்டர் கிராமத்தில் நிரந்தரமாகத் தங்குகிறாரா? கிராமத்தவர்களின் லீலைகள் டொக்டருக்குத் தெரியவருகிறதா? தொழிற்சாலை தொடங்கப்படுகிறதா?

மொத்தக் கதையையே ஓரளவு சொல்லிவிட்டேன். இதையாவது நீங்களே சின்னத் திரையில் பார்த்துக்கொள்ளுங்கள்.

கனேடிய ஆங்கிலத் திரைப்படங்களுடன்[அப்படியொன்று இருக்கிறதா என்ன? ] ஒப்பிடுகையில் கியூபெக் மாகாணப் பிரெஞ்சுத் திரைப்படங்கள் எவ்வளவு நன்றாக இருக்கின்றன என்று அலச நினைத்தேன். இன்னொரு பதிவில் எழுதுகிறேன்.

Seducing Doctor Lewis என்ற ஆங்கிலத் தலைப்பில் அமெரிக்காவில் வெளியான இத்திரைப்படம் 2004 சன்டான்ஸ் திரைவிழாவில் மக்களின் தேர்வுக்கான விருதைப்பெற்றது. கென் ஸ்கௌட் திரைக்கதை எழுத, Jean-Franவூois Pouliot இயக்கியுள்ளார். இவரின் முதலாவது படம் இது. Raymond Bouchard டொக்டரைக் கிராமத்தில் தங்க வைத்து தொழிற்சாலையைத் தொடக்க நினைக்கும் கிராமத்தவர்களில் முதன்மையானவராக நடித்திருக்கிறார். David Boutin டொக்டர் லூயிஸாக நடித்திருக்கிறார்.

கியூபெக் மாகாண கரையோரக் கிராமம் செயிண்ட் மாரீ-லா-மோடேர்ன்னாக உருவெடுப்பத்திருப்பது Harrington Harbour என்ற இன்னொரு கரையோரக் கிராமம். அக்கிராமத்தைப் பற்றித் தெரிந்துகொள்ள இங்கே சுட்டவும். க்யூபெக் மாகாணத்தின் வரைபடத்தை இங்கே காணலாம்.

Trailer:

பார்த்ததில் பிடித்த கியூபெக் மாகாணப் பிரெஞ்சுப் படங்களைப்பற்றி இங்கே கதைக்கலாம் என்று இருக்கிறேன். பார்ப்போம்..

தமிழ், தமிழ்ப்பதிவுகள், தமிழ்ப்பதிவு, திரைப்படங்கள், திரைப்பார்வை, Tamil, Tamilblogs