திரைப்பார்வை

கிறிஸ்டோபர் நோலன் இயக்கத்தில் கை பியர்ஸ் (Guy Pearce), ஜோ பான்டோலியானோ(Joe Pantoliano), காரந்ஆன் மொஸ்(Carrie-Ann Moss) ஆகியோர் நடித்திருக்கின்றனர்.

கை பியர்ஸ்ஸின் ‘ஷெல்பி’ என்ற கதாபாத்திரம் தன்னுடைய மனைவியை பாலாத்காரப்படுத்தி கொலை செய்பவனை பழிக்குப்பழி வாங்க தேடி அலைகிறான். தொடர்ந்து என்ன நடக்கிறது என்கிற சாதாரணமான கதைதான். ஆனால் நோலனின் திரைக்கதையும் படத்தை அவர் எடுத்து சென்றிருக்கும் விதமும் இதை வேறுபடுத்துகிறது.

படத்தைப்பற்றி சொல்வதற்கு முன்னால் நான் இந்தப்படத்தை பார்த்த கதையை கட்டாயம் சொல்லியாக வேண்டும். இந்தப்படம் நன்றாக இருக்கும் பார் என்பதைத்தவிர வேறு எதுவும் என் நண்பன் சொல்லவில்லை. பார்க்க ஆரம்பித்து முதல் பத்து நிமிடங்கள் ஓடியும் ஒன்றும் விளங்காததால் மறுபடியும் இரண்டு தடவை பார்த்தேன். அப்படியும் அந்த முதல் பத்துநிமிடக்காட்சிகள் ஒன்றும் விளங்காமல் தலையும் வலிக்கத்தொடங்கி விட்டது. சரியென்று இணையத்தில் பத்திரிகை விமர்சனம் என்ன சொல்லியிருக்கிறார்கள் என்று படித்துவிட்டு மறுபடி பார்த்த போதுதான் கொஞ்சமாவது விளங்கியது.

அட என்னமோ புரியாத படம்னு பிகு பண்ணுறாளேன்னு நீங்க யோசிக்கலாம். இதோ உங்களுக்காக கதைச்சுருக்கம்.

ஷெல்பி தன் மனைவியின் கொலைகாரனை தேடி அலைவதுதான் படம் என்று சொன்னேனல்லவா? அதற்கும் மேல் சில விஷயங்கள் இருக்கின்றன. ஷெல்பிக்கு ஒரு வித அபூர்வமான அம்னீஷியா இருக்கிறது. எங்கோ பலத்த அடிபட்ட அவனுக்கு அந்த நிமிடத்திற்கு முன் நடந்த ஒரு விஷயமும் ஞாபகம் இல்லை. அவன் மனைவியைக்கொலை செய்தவன் எப்படி இருப்பானென்பது அவனுக்கு ஞாபகம் இல்லை. தான் யார் என்பதும் அவன் மனைவி கொலை செய்யப்படுவதற்கு முன் நிகழ்ந்த நிகழ்ச்சிகள் அனைத்தும் அவனுக்கு ஞாபகம் இருக்கிறது. ஷார்ட் டேர்ம் மெமரிதான் உதைக்கிறது. அதுவும் எப்படி? ஒரு நிமிடத்திற்கு முன் நடந்த நிகழ்ச்சி கூட ஞாபகம் இல்லாத அளவுக்கு!

அதற்கும் அவன் ஒரு வழியைக்கண்டுபிடிக்கிறான். உடனடி புகைப்படக்கருவியை பயன்படுத்தி புகைப்படங்களாக எடுத்துத்தள்ளுகிறான்.(பின்பக்கம் குறிப்புகளுடன்) தன் உடலில் பார்க்கக்கூடிய இடங்களில் எல்லாம் குறிப்புகள் எழுதுகிறான். பச்சை குத்திக்கொள்கிறான்.

இன்னுமொரு புதிர் ஸ்போர்ட்ஸ் கார் ஓட்டும், விலையுயர்ந்த ஆடைகளை அணியும் அவன் ஏன் சின்னச்சின்ன ஹோட்டல்களில் தங்க வேண்டும் என்பது.

இப்பவே தலை சுத்துதா அல்லது என்ன பெரிய புதிர் இருக்குப்போ அவன் கண்டுபிடிச்சுருவான் சுலபமான்னு நினைக்காதீர்கள்.

படத்தில் பல காட்சிகள் பலரின் கண்ணோட்டத்தில் எடுக்கப்பட்டிருக்கின்றன. புரிந்தது போலிருக்கும். அடுத்த ஆளின் கண்ணோட்டத்தை பார்த்ததும் குழம்பிப்போகும். படம் எடிட் செய்யப்பட்டிருக்கும் விதம்தான் இதை மற்ற திரில்லர்களிலிருந்து வேறுபடுத்திக்காட்டுகிறது.

படத்தின் கதாநாயகனாக வரும் ஆஸ்திரேலிய நடிகர் கை பியர்ஸ் நல்ல தேர்வு. இதற்கு முன் இவரை எல்லே கான்பிடென்ஷியல் (அது பற்றி இன்னொரு நாள்) படத்தில் பார்த்தது பிறகுதான் ஞாபகம் வந்தது. இறுக்கமான முகபாவத்துடன் சிறிது திருவிழாவில் தொலைந்த குழந்தை போன்ற பார்வையும். அம்னீஷியாவின் காரணமாக இவரின் கதாப்பாத்திரம் கஷ்டப்படும் இடங்களில், இவரை ஏமாற்ற நினைப்பவர்களை எதிர்கொள்வதில், ஞாபகசக்தியின்மையினால் பார்ப்பவர்கள் நல்லவர்களா இல்லையா என்று கஷ்டப்படும்போது மற்றும் படத்தினூடே குட்டிக்கதை போல வந்துபோகும் ஷெல்பியின் தொழில் முறை அனுபவம் என்று பல இடங்களில் பேஷ் போட வைக்கிறார்.

படத்தின் இதர முக்கியமான பாத்திரங்கள் காரி-ஆன் மொஸ். கனடிய நடிகையான இவரை டிரினிடி என்னும் பாத்திரத்தில் மேட்ரிக்ஸ் (Matrix) படத்தில் பார்த்திருப்பீர்கள். சில காட்சிகளில் வந்திருந்தாலும் படத்தின் கதையோட்டத்திற்கு வெகுவாகப்பயன்படுகிறார்.

அற்புதமான குணச்சித்திர நடிகர் என்று பலரால் பாராட்டப்பெற்ற ஜோ பான்டோலியானோ இந்தப்படத்திலும் அருமையாக நடித்துள்ளார். மேலும் விளக்க ஆரம்பித்தால் புதிர்கள் அவிழ ஆரம்பித்துவிடும் என்ற காரணத்தால் இவரைப்பற்றி அதிகம் சொல்லாமல் விடுகிறேன். யாருப்பா இந்தாளுன்னு கேட்பவர்களுக்கு - மேட்ரிக்ஸ் (Matrix) படத்தில் காட்டிக்கொடுப்பவனாக நடித்திருக்கிறார்.

நாங்களே படம் பார்த்துத்தெரிந்து கொள்கிறோம் என்பவர்கள் இத்துடன் நிறுத்திக்கொண்டுவிடுங்கள்.

மற்றவர்களுக்கு…….

சாதாரணமாக ஒரு படம் கடந்த காலத்தில் தொடங்கி நிகழ்காலத்திற்கு வரும் அல்லது நிகழ்காலத்தில் தொடங்கி கடந்த காலத்தில் சஞ்சரித்து தொடங்கிய நிலைக்கு வரும். மெமென்டோ இவ்வமைப்பிலிருந்து முற்றிலும் மாறுபடுகிறது. இப்போது சொன்னமாதிரி ஒரு படத்தை எடுத்து அதை அப்படியே மாற்றி எடிட் பண்ணினால் என்ன நடக்கும்? ஆரம்பக்காட்சியாக வருவது முடிவுக்காட்சியாக வரும். அதேதான் இந்தப்படத்தில் நடந்திருக்கிறது. ie The movie goes backwards in terms of plot. இது புரியாமல்தான் நான் தலைமுடியை பிய்த்துக்கொண்டேன். இப்படி குழப்பியடிக்கும் கதையில் பலப்பல புதிர்கள். நாம் சாதாரணமாக தமிழ் சினிமா பார்ப்பதுபோல 10% மூளையை பயன்படுத்தி பார்க்கிற கதையெல்லாம் நடக்காது. (10 சதவீதமே அதிகம் என்கிறீர்களா? அதுவும் சரிதான் :)) ).

மொத்தத்தில் பார்க்கத்தவறாதீர்கள்.

ராபார்ட் டிநீரோ, லியோனார்டோ டி காப்ரியோ, எல்லென் பார்கின் நடித்திருக்கிறார்கள். Michael Caton-Jones இயக்கி இருக்கிறார். Tobias Wolf எழுதிய கதையை திரைக்கதையாக்கி இருப்பவர் Robert Getchell.

கதை:

1950களில் நடக்கும் கதையிது. டோபியாசும் அவனுடைய அம்மா கரோலினும் ஒரு பழைய காரில் மேற்கு நோக்கி செல்கிறார்கள். கரோலினின் கொடுமைக்கார காதலனிடம் இருந்து விடைபெற்ற அவர்களை காதலனும் தொடர்கிறான். சால்ட் லேக் சிட்டியில் அவன் கண்ணில் மண்ணைத்தூவி விட்டு சியாட்டலுக்கு செல்கிறார்கள். ஒவ்வொரு முறையும் நல்ல மாணவனாக இருக்கவேண்டும் என்று நினைத்து, முயற்சிக்கிறான் டோபியாஸ். ஆனால் பலன் என்னவோ பூஜ்ஜியம்தான். அவ்வப்போது பள்ளிக்கு டிமிக்கி கொடுப்பவனாகவும் சிலசமயம் பள்ளியில் தகராறு செய்பவனாகவும் இருக்கிறான். இதற்கிடையில் கரோலின், ட்வைட் என்பவனை சந்திக்கிறாள். வாழ்நாள் முழுவதும் தனியே இருக்கமுடியாது என்று முடிவு செய்த கரோலின், தன் மகனிடம் ட்வைட்டிடம் நன்றாக நடந்து கொள்ளுமாறு கேட்கிறாள். ஆனால் முதல் பார்வையிலேயே இருவருக்கும் ஒருவரையருவர் பிடிக்காமல் போய் விட்டது. ஆனாலும் கரோலினுக்காக ட்வைட் குடும்பத்தினருடன் சில நாட்கள் தங்குகிறான் டோபியாஸ். அப்போது ட்வைட் எப்படிப்பட்டவன் என்பதை டோபியாஸ் தெரிந்து கொண்டு விட்டான். அதை உணரும் ட்வைட், கரோலினுக்கு தெரியாமல் டோபியாஸை துன்புறுத்துகிறான்.

ட்வைட் தாழ்வு மனப்பான்மை நிறைந்தவன். அதனாலேயே தன்னையே வெறுக்கும் அவன், மற்றவர்களை எல்லாவற்றிற்கும் குற்றம் சாட்டுகிறான். அடுத்தவர் மேல் பொறாமையும் கொண்டவனாகவும் சிறுபிள்ளைத்தன்மையாக நடப்பவனாகவும் இருக்கிறான். பொய் சொல்வது அவனுக்கு அல்வா சாப்பிடுவது போல.

இதற்கிடையில் கரோலினும் ட்வைட்டும் திருமணம் செய்து கொள்கிறார்கள். கரோலினுக்கும் ட்வைட் பற்றி தெரியாமல் இல்லை. ஆனாலும் ட்வைட்டுக்கும் டோபியாசிற்கும் இடையில் அவள் வராமல் அமைதியாக இருக்கிறாள். இரண்டு வருடங்கள் இப்படி ஓடிப்போனது. நல்ல மாணவனாக மாற நினைத்தாலும் டோபியாசால் அப்படி இருக்கமுடியவில்லை. இத்தனைக்கும் நடுவில் அவனுக்கு இருக்கும் நம்பிக்கை நட்சத்திரம் யேல் பல்கலைக்கழகத்தில் படித்து வரும் அவனது அண்ணன். கரோலினும் டோபியாஸின் தந்தையும் பிரிந்தபோது அண்ணன் தம்பி இருவரும் பிரிக்கப்பட்டனர். சிறுவயதில் இருந்து சந்தித்துக் கொள்ளவில்லை என்றாலும் டோபியாஸிற்கு உதவுவதாக சொல்லி கல்லூரி புதுமுக வகுப்பிற்கான நுழைவுப்பத்திரங்களை அனுப்புகிறான் டோபியாஸின் அண்ணன்.

டோபியாஸ் பல இடையூறுகளை எப்படி சமாளிக்கிறான்? கல்லூரிக்கு போக முடிகிறதா? அல்லது அதற்குள்ளே ட்வைட் அவனை அடித்தே கொன்று விடுகிறானா? என்பதுதான் படம்.

நடிகர்கள்:

ராபர்ட் டி நீரோ தான் ட்வைட். தாழ்வு மனப்பானமை கொண்ட ட்வைட்டை தன்னுடைய இயல்பான திறமையினால் நம் கண் முன் கொண்டு வருகிறார் டி நீரோ. கரோலினையும் அவளுடைய தோழிகளை தன்னுடைய நடவடிக்கைகளால் கவருகிறான் ட்வைட். ஆனால் நடுவில் நெருஞ்சி முள் போல டோபியாஸ் இருக்கிறான், அவன் தன்னை முதற்பார்வையிலேயே அறிந்து கொண்டான் என்பதையும் அது தனக்கும் தெரியும் என்பதை ஒரு சில அசைவுகளிலேயே வெளிப்படுத்தி விடுகிறார் டீ நீரோ. பார்வையாளர்களை வெறுக்க செய்யும் வேலையை இயல்பாக செய்திருக்கிறார் டீ நீரோ.

நம்மை ஆச்சரியப்பட வைப்பது பதினேழு வயது லியோனார்டோ டீ காப்ரியோதான். பதின்மூன்று வயது டோபியாசாக அறிமுகமாகி அடுத்த மூன்று வருடங்களில் ஏற்படும் மாறுதல்களை அழகா காட்டி இருக்கிறார். கதையை நகர்த்தி செல்வதே டீ காப்ரியோதான். ராபர்ட் டி நீரோ போன்ற நல்ல நடிகருக்கு இணையாக முதல் படத்திலேயே நடித்து தன் திறமையை நிரூபித்திருக்கிறார் டீ காப்ரியோ. முக்கியமாக ட்வைட்டையும் அவனுடைய குள்ள நரித்தனமான தாக்குதல்களையும் தன்னால் நன்றாக எதிர்கொள்ள முடியவில்லையே என்று புழுங்கும்போதெல்லாம் ஜொலிக்கிறார் டீ காப்ரியோ. (நம்மூர் நடிகர்களுக்கு போட்டுக்காட்ட வேண்டும் இந்தப்படத்தை!)

இந்தப்படத்தில் நடித்த பிறகு பல நாட்களுக்கு ராபர்ட் டீ நீரோ, லியோர்னாடோ புராணம் பாடிக்கொண்டிருந்தார் என்று படித்திருக்கிறேன். அது சரிதான் என்று இந்தப்படம் பார்த்த பிறகு சொல்லிக்கொண்டேன்.

The Jackal படத்தை இயக்கிய Michael Caton-Jonesதான் இயக்குநர். Coming-to-age வகையை சேர்ந்த இந்தப்படத்தை கொஞ்சம் வித்தியாசமாக நிஜத்தை பிரதி பலிக்குமாறு எடுத்திருக்கிறார் இயக்குநர். ஒவ்வொரு கதாபாத்திரத்தையும் நமக்கு நன்கு அறிமுகப்படுத்தி அதனாலேயே படத்தோடு ஒன்ற வைத்து விட்டார். கதையும் முக்கிய காரணம். கதாசிரியர் டோபியாஸ் வூல்�பின் சொந்தக்கதையே படமாக்கப்பட்டது. ட்வைட்டின் ஊரான Concrete, Washingtonதான் டோபியாஸ் வளர்ந்த இடம். படம் வெளிவருவதற்கு சில வருடங்களுக்கு நிஜ ட்வைட் இறந்துபோனாராம்.

லியோனார்டோ - விளையும் பயிரை முளையில் காணலாம்!